Vizat Shengen të kosovarëve, të vlefshme deri në fund të vitit

Qytetarëve të Kosovës që posedojnë vizë Schengen me validitet territorial të kufizuar nuk do t’u kërkohet vizë për të hyrë, qëndruar apo kaluar transit përmes territorit të Republikës së Kroacisë, deri më 31 dhjetor 2013

Kroacia ka vendosur të zgjasë afatin e lejimit të shtetasve kosovarë me viza Shengen që të kalojnë nëpër territorin e saj apo edhe të qëndrojnë në të, bëhet e ditur në një njoftim të Ministrisë së Punëve të Jashtme të Kosovës.

Autoritetet e Ministrisë së Punëve të Jashtme të Kroacisë gjatë një takimi me një delegacion të lartë të Ministrisë së Punëve të Jashtme të Kosovës, i cili po qëndron për vizitë zyrtare në Zagreb, kanë njoftuar se kanë marrë vendim për zgjatjen e afatit për hyrjen në territorin e Republikës së Kroacisë, të qytetarëve të Kosovës që posedojnë vizë Schengen, thuhet në njoftim.

Sipas këtij vendimi, qytetarëve të Kosovës që posedojnë vizë Schengen me validitet territorial të kufizuar (Valid for: Schengen States (–ES, GR, SK)) nuk do t’u kërkohet vizë për të hyrë, qëndruar apo kaluar transit përmes territorit të Republikës së Kroacisë, deri më 31 dhjetor 2013.

Gjatë vizitës në Zagreb, delegacioni i lartë i MPJ-së, ka pasur takime me përfaqësues të lartë kroatë, ku është konfirmuar vullneti i dyanshëm për thellimin bashkëpunimit ndërmjet dy shteteve si dhe është konfirmuar përkrahja e Kroacisë për Republikën e Kosovës, me theks të veçantë në proceset euro-integruese, thuhet veç tjerash në njoftim.