Ministri serb thotë se Serbia pa Kosovën nuk mund të ekzistojë

Ministri i Inovacionit në Serbi, Nenad Popoviq ka deklaruar se: “Serbia është krijuar në Kosovë dhe pa të nuk mund të ekzistojë”.

Sipas Popoviqit, Bashkimi Europian nuk ka kapacitet për të bindur shqiptarët që të bëjnë koncesione. 

“Jam i sigurt se një model do të gjendet dhe kjo është një autonomi e gjerë për Kosovën, sikur që ka ndokund në botë, por sipas kornizës së Rezolutës 1244 dhe Kushtetutës së Serbisë. Marrëveshjet në Bruksel kanë vdekur. BE nuk ka kapacitet për të bindur shqiptarët që të bëjnë koncesione. Pala serbe ishte vërtetë bashkëpunuese, por që shqiptarët nuk kanë bërë një hap të vetëm. As Be nuk ka bërë asgjë”, ka thënë Popoviq, për B92, përcjell Albinfo.ch.

Popoviq thotë se Kosova dhe Serbia duhet të gjejnë një format të ri për bisedime. 

“Serbia është e gatshme për kompromis. Nuk mund të ketë zgjidhje pa pjesëmarrjen e Amerikës, Rusisë, Kinës dhe Bashkimit Evropian, të gjithë së bashku”, ka thënë Popoviq.