Kantoni Zug, më atraktivi për ekonomi

Në fund të listës është Kantoni Jura, ndërsa po ashtu në zonën nga fundi janë edhe kantonet Graubünden, Neuchatel dhe Wallis

Kantoni i Cug-ut (Zug), është zgjedhur si më atraktivi për ushtrimin e veprimtarive ekonomike. Në përgjithësi kantonet me atraktivitet më të madh në këtë drejtim janë ato të Zvicrës qendrore, ka konstatuar një studim i bankës Credit Suisse. Kantone tjera të këtij regjioni si Schwyz, Nidwalden, Luzern dhe Obwalden kanë zënë vendet nga katër deri në tetë në ranglistë.

Por në vendin e dytë është kantoni më i madh dhe më i fuqishëm i Zvicrës, Cyrihu dhe në të tretin kantoni Baselstadt.   

Mbi mesataren e Zvicrës sa i përket tërheqjes për të ushtruar aktivitete ekonomike janë edhe kantoni Aargau dhe ai i Bernës.

Kriteret në bazë të të cilave është vlerësuar atraktiviteti sipas këtij studimi kanë qenë në radhë të parë taksat e ulëta dhe lidhjet e mira me rrugët e komunikacionit.

Në fund të listës së kantoneve më tërheqëse është Kantoni Jura, ndërsa po ashtu në zonën nga fundi janë edhe kantonet Graubünden, Neuchatel dhe Wallis.