Sërish tërmet i shkaktuar nga shpimet gjeotermike

Dridhja ka ndodhur në thellësinë prej 4000 metrash, disa qindra metra pranë shpimit për energji gjeotermike që po bëhet në perëndim të qytetit St. Gallen

Në St. Gallen sërish është regjistruar një dridhje e tokës. Fuqia e tërmetit kësaj here ka qenë 2.0 shkallë të Richterit.

Dridhja ka ndodhur në thellësinë prej 4000 metrash, disa qindra metra pranë shpimit për energji gjeotermike që po bëhet në perëndim të qytetit St. Gallen.

Pasi që edhe muaj më parë kanë ndodhur disa dridhje të ngjashme në regjionin rreth shpimeve në fjalë, autoritetet e vejnë në lidhje këtë tërmet me tronditjen e tokës që shkaktojnë punimet në shpimet e tilla të thella. Përkundër kësaj, punimet në projektin gjeotermik kanë vazhduar si më parë, shkruan st.galler.tagblatt.

Aktualisht janë duke u bërë përgatitjet për testimin e planifikuar të produksionit gaz – ujë  në sipërfaqen e tokës. Projekti ishte ndërprerë përkohësisht kur, nga fundi i korrikut të këtij viti kishte ndodhur një tërmet i fuqisë 3.5 shkallë të richterit që besohet të jetë shkaktuar nga këto punime.