Krerët institucional kosovarë reagojnë pas vrasjes së 7 vjeçarit në Zvicër

(KEYSTONE/Georgios Kefalas)

Për vrasjen e shtatëvjeçarit nga Komuna e Lipjanit në Bazel të Zvicrës ka reaguar edhe presidenti i Kosovës, Hashim Thaçi.

Në një postim në Facebook, Thaçi ka shkruar se kjo ngjarje i ka tronditur të gjithë dhe se Kosova e Zvicra do të luten për të.

“Vrasja makabre e shtatëvjeçarit në Bazel, ka tronditur gjithë opinionin në Kosovë dhe Zvicër. Në këto momente shumë të rënda, ndaj dhimbjen me familjen e Mergimit. E gjitha Kosova dhe Zvicra do të lutet për të!”, ka shkruar Thaçi, përcjell albinfo.ch

Edhe zëvendëskryeministri i Kosovës, Fatmir Limaj, ka ngushëlluar familjen e 7 vjeçarit, i cili u vra dje në Bazel të Zvicrës.

Limaj në një postim në llogarinë e tij në ‘Facebook’, ka thënë se në këto çaste të rënda për familjen e Mërgimit, bashkëndjen me dhimbjen e tyre.

“Thellësisht i prekur nga rasti i vrasjes së Mërgimit 7 vjeç, një ditë më parë në Bazel të Zvicrës. Në këto çaste të rënda për familjen e Mërgimit, bashkëndjejmë me dhimbjen e tyre. Në emrin tim personal, familjes së 7-vjeçarit dhe të afërmeve të tyre, u shpreh ngushëllimet më të sinqerta”, ka shkruar Limaj në ‘Facebook’.

Për rastin e vrasjes së 7 vjeçarit ka reaguar edhe kryetari i Kuvendit, Kadri Veseli

“Bashkëndjej me dhimbjen e familjes dhe të afërmve të Mërgimit, fëmijës shtatvjeçar nga Kosova, që mizorisht u vra në Zvicër. Lutjet tona janë për ta“