Punësimi i femrave, shumë më i lartë në Zvicër se në BE

Nga ana tjetër, femrat për të njëjtën punë fitojnë mesatarisht nga 18 për qind më pak se meshkujt. Ndërsa në BE ky dallim është 16 për qind.

Në Zvicër, proporcionalisht me numrin e banorëve ka më tepër femra të punësuara se sa në të gjitha vendet e BE-së. Por, siç ka konstatuar Zyra Federale e Statistikave në një studim, edhe dallimi në paga në mes të meshkujve dhe femrave askund në BE nuk është më i madh se në Zvicër.

Sipas krahasimit të bërë del se në Zvicër punojnë 74 për qind e femrave ndërsa mesatarja e punësimit të femrave në vendet e BE-së është  59 për qind.

Ndërsa sa i përket dallimit në të ardhura në mes të meshkujve dhe femrave, në Zvicër është pak me i madh. Këtu femrat për të njëjtën punë fitojnë mesatarisht nga 18 për qind më pak se meshkujt. Ndërsa në BE ky dallim është 16 për qind. Natyrisht, brenda vendeve të BE-së dallimi në këtë pikë është më i madh, ku prin Estonia me 27.3%.

Zvicra është mbi mesataren e BE-së edhe sa i përket pjesëmarrjes së gruas në parlament. Mesatarja e femrave në parlamentet e shteteve anëtare të BE-së është 26.3% ndërsa në Zvicër 29%.

Brenda BE-së dallimet edhe në këtë pikë janë shumë të mëdha, shkruan azonline.ch. Kështu në Spanjë vetëm 8%  të deputetëve janë femra ndërsa në Suedi 44.7%.

Femrat në Zvicër janë më pak të përfaqësuara në mesin e personave që studiojnë në krahasim me femrat në vendet e BE-së. Kështu, në shtetet e përmendura përqindja e femrave studente prej kohësh  e ka kaluar atë ë meshkujve. Femrat përbëjnë pra 55.2% të studentëve. Ndërsa në Zvicër 49.2 për qind të studentëve janë femra.