Kosovarët informohen lidhur me integrimin në Zvicër

Bashkësia e kosovarëve katolikë, është informuar nga autoritetet e komunës Wohlen lidhur me rregullimin shtetëror të Zvicrës dhe integrimin

Të dielën e kaluar është mbajtur në Chappelehof të Wohlenit (Aargau) një aktivitet i komisionit për çështje të integrimit dhe të migracionit që vepron në kuadër të CVP të kantonit. Me dëshirën e bashkësisë së kosovarëve katolikë, në këtë aktivitet është bërë informimi lidhur me çështje të rregullimit shtetëror të Zvicrës dhe me probleme nga përditshmëria.

Rreth 60 kosovarët dhe pjesëmarrësit tjerë janë përshëndetur dhe informuar në lidhje me komunën nga nënkryetari i saj, Paul Huwiler (CVP).

Në vazhdim, mësuesi Daniel Güntert për të pranishmit ka mbajtur një referat interesant prej gjysmë ore në lidhje me rregullimin shtetëror të Zvicrës. Një referat tjetër e ka mbajtur përgjegjësja për integrim në komunën e Wohlenit, Katharina Stäger. Ajo i ka prezantuar publikut informacione të dobishme në lidhje me qasjen me autoritetet, shkollat dhe me procedurat që duhet ndjekur në zyra të ndryshme.

Komisioni për migracion dhe integrim i CVP konsideron se me oferta të tilla që nuk janë të nivelit shtetëror, jepet një kontribut substancial për integrimin e të huajve, shkruan azonline.ch.