Diaspora mban gjallë Kosovën

Vitin e kaluar, diaspora ka dërguar 457 milionë euro në Kosovë. Këto të hyra shënuan rritje vjetore prej 23.1 për qind në krahasim me vitin 2011, raporton ASK

Diaspora kosovare vazhdon të mbetet stabilizatori kryesor i mirëqenies sociale në Kosovë. Vetëm gjatë vitit të kaluar nga mërgimtarët kosovarë kanë hyrë rreth 460 milionë euro, para këtu që janë shpenzuar kryesisht për konsum, por edhe për investime.

Kështu u tha të premten në konferencë organizuar nga Agjencia e Statistikave të Kosovës ku u publikuan “Rezultatet e Anketës mbi Remitancat në Kosovë 2012”. Kjo anketë është përkrahur nga projekti “Angazhimi i Diasporës në Zhvillimin Ekonomik” i implementuar bashkërisht nga  UNDP dhe IOM, me financimin e Qeverisë së Finlandës. 

Vitin e kaluar, diaspora kosovare ka dërguar  457 milionë euro në Kosovë. Këto të hyra në vitin 2012 shënuan rritje vjetore prej 23.1 për qind në krahasim me vitin 2011, thuhet në studim të Agjencisë së Statistikave.

Kryeshefi i ASK-së, Isa Krasniqi ka thënë se në vitin 2012 ka pasur më pak familje që kanë pranuar remitenca se në vitin 2011.

Ndërsa Gani Gerguri nga Banka Qendrore e Kosovës, tha se remitancat në vendin tonë janë burim i rëndësishëm i financimit.

“Remitancat të gjithë e dimë se janë një kategorie rëndësishme për shoqërinë tonë, për ekonominë vendit tonë, kanë qenë burim i shumë i rëndësishëm i financimit, mbesin ende burim shumë i rëndësishëm shuma e tyre arrin diku rreth 605 milion në fund të vitit 2012, ndërsa ky trend vazhdon”, ka thënë ai.  

Ndërsa, Chargee d’Affaires, nga ambasada e Finlandës, tha se Kosova ka nevojë për të gjitha burimet për rritje ekonomike.

“Unë inkurajoj të gjithë që t’i shfrytëzojnë statistikat e studimit të sotëm për të mësuar prej tij dhe të veprojnë sipas tij. Përveç rëndësisë së statistikave duhet t’i hapim sytë para faktit se studimi thekson pranuesit remitancave janë kryesisht perona të moshuar dhe të cilët vuajnë nga shkalla e lartë e papunësisë”, deklaroi ajo. 

Sipas raportit të ASK-së, remitancat e dërguara në vitin 2012 shënuan rritje vjetore pre, 23,1 për qind në krahasim me vitin 2011. Shifra totale e remitancave të dërguara është 457 milion ose 9,3 për qind e bruto produktit vendor të Kosovës.

Sipas raportit, në vitin 2012, gjithsej 22,4 për qind të familjeve kosovare pranuan remitanca nga familjet e tyre në diasporë.