Mjegulla bllokon aeroportet e Shkupit dhe Prishtinës

Mjegulla e madhe ka paralizuar aeroportet e Shkupit dhe Prishtinës. Mjegulla e dendur ka pamundësuar uljen dhe ngritjen e aeroplanëve

Shumica e aeroplanëve janë orientuar  për në aeroportin e Ohrit ose në aeroportin e Sofjes, transmetojnë mediat informacionet nga aeroporti i Shkupit.

Prej mbrëmë janë anuluar fluturimet nga Zagrebi dhe Stambolli, Vjena dhe Ajdhoven, duke i dedikuar për aterim në Aeroportin e Sofjes.

Aeroplanët nga Cyrihu, Dizeldorfi dhe Lubjana janë urdhëruar për të ateruar në Ohër.

Zyrtarët e aeroportit të Shkupit nuk kanë mundur të informojnë udhëtarët se kur mund të normalizohet orari i fluturimeve, me arsyetimin se nuk e dinë deri kur do të ketë mjegull.

Sipas informacioneve, aeroporti i Shkupit “Aleksandri i Madh” nuk ka marrë përgjegjësinë për transportin e udhëtarëve, por kompanitë ajrore janë ato që kanë angazhuar autobusë për të transferuar pasagjerët.

Edhe zyrtarë të Aeroportit Ndërkombëtarë të Prishtinës, Adem Jashari, bëjnë të ditur për Radion Evropa e Lirë, se për shkak të mjegullës së dendur nuk është realizuar asnjë aterim apo fluturim deri në mesditë në këtë aeroport.

Zyrtarja për informim në Aeroportin e Prishtinës, Valentna Gara, thotë se nga dje pasdite e deri më tash nuk ka pasur fluturime. Ajo tregon se një numër i madh i udhëtarëve po presin në ambientet e aeroportit.

“Pasagjerët i udhëzojë që t’i kontaktojnë kompanitë e tyre ajrore dhe ata merren me secilin rast veç e veç”, thotë Gara.

Përveç mjegullës në Shkup, për më shumë se një javë, ajri është aq i ndotur, saqë autoritetet u kanë sugjeruar qytetarëve që të mos dalin jashtë, të mos ajrosin banesat dhe të mos përdorin makinat.

Përqendrimi i grimcave më të vogla se 10 mikrometra është mbi kufirin maksimal të lejueshëm, raportojnë mediet maqedonase.

Dukshmëria në Shkup raportohet të jetë vetëm disa dhjetëra metra.

Në mesin e rekomandimeve për qytetarët është edhe që të mos përdorin sofat me drunj, ndërsa ndërmarrjeve u është rekomanduar që përkohësisht të ndalojnë të gjitha aktivitetet që përfshijnë përdorimin e kimikateve.