Makolli, në promovimin e rrjetit të bizneseve shqiptare në Nju Jork

"Diaspora sjellë jo vetëm paratë, por edhe përvojën më të mirë të biznesit të fituar në mërgim" ka thënë me këtë rast ministri Makolli

Ministri i Diasporës, Ibrahim Makolli dhe zëvendësministri i Tregtisë dhe Industrisë Bernard Nikaj kanë prezantuar në Nju Jork, para afaristëve shqiptaro-amerikanë, mundësitë investuese në Kosovë si dhe kanë promovuar krijimin e një rrjetëzimi të bizneseve.

Para një grupi prej 70-80 biznesmenësh dhe të interesuarish, dy funksionarët e lartë të shoqëruar nga stafi tjetër profesional kanë folur për reformat ligjore, lehtësitë dhe mundësitë e të bërit biznes në Kosovë, duke e quajtur diasporën një nga asetet më të rëndësishme të ekonomisë dhe të industrializimit të Kosovës, njofton RTK..

“Diaspora sjellë jo vetëm paratë, por edhe përvojën më të mirë të biznesit të fituar në mërgim,” tha ministri Makolli. Bernard Nikaj foli për ngritjen e rangimit të Kosovës për 40 vende në renditjen botërore të të bërit biznes, për të theksuar se në rajon para Kosovës është vetëm Maqedonia.

Zyrtarët e Kosovës me këtë rast kanë folur edhe për mundësitë konkrete të investimeve në secilën komunë veç e veç, investimet përmes partneritetit privato-publik si dhe krijimin e zonave të lira ekonomike që do të jenë shumë dashamirëse ndaj investimeve dhe bizneseve të reja.

Naim Dedushaj, drejtor i departamentit të përkrahjes së investimeve në Ministrinë e Diasporës, foli për krijimin e rrjetëzimit të bizneseve të shqiptarëve në Zvicër, Gjermani, Austri dhe zgjerimin e tyre kudo që ka përqendrim të diasporës nga Kosova.

Në fund të këtij forumi njëditësh u zgjodh një bord prej 11 vetash, afaristë shqiptaro-amerikanë, si bërthamë e rrjetëzimit në këtë metropol të SHBA-së.