Prokuroria: Burrat e rikthyer kishin fletarrestim

Katër luftëtarë, 32 gra e 74 fëmijë janë rikthyer mbrëmë nga luftëra e Sirisë për në Kosovë.

Kryeprokurori i Prokurorisë së Shtetit, Aleksandër Lumezi, ka folur rreth të rikthyerve në një konferencë të jashtëzakonshme të thirrur gjatë ditës së sotme.

“Ndaj katër personave të kthyer në Kosovë është rifilluar procedura penale kundër tyre. Kjo procedurë ka filluar vite më parë, mirëpo është pezulluar”, tha Lumezi.

Lumezi nuk dha informacione se nga cilat vende janë burrat e rikthyer.

“Sot pas marrjes së informacioneve nga Policia e Kosovës, kemi marrë vendimin për ndalimim e katër shtetasve, të cilët kanë marrë pjesë si luftëtarë në Siri. Ata janë në masën e ndalimit dhe shumë shpejt prokurori të merr masat. Ndaj 119 personave deri më tani kemi ngritur akte akuzuese”, tha Lumezi.

Prokurori i Prokurorisë Speciale, Sylë Hoxha, tha se ndaj katër të dyshuarve të rikthyer ka pasur urdhër arrest, shkruan Albinfo.ch.