HRW: Romët të diskriminuar në Ballkan

Organizata Human Rights Watch i rekomandon Bosnjës, Serbisë dhe Kosovës që të ndalojnë abuzimet ndaj komunitetit romë

Vendet e Ballkanit Perëndimor kanë bërë progres të kufizuar sa i përket  llogaridhënies për krimet e luftës dhe çrrënjosjes së diskriminimit dhe abuzimit të minoritetit rom. Kështu konsideron Organizata Human Rights Watch në raportin  e fundit për të drejtat e njeriut më vitin 2013.

HRW ka konstatuar progres të vogël në këtë rajon edhe sa i përket adresimit të dhunës ndaj gazetarëve dhe komunitetit homoseksual. Grupi po ashtu thotë se ka mungesë të zgjidhjeve të qëndrueshme për refugjatët dhe të zhvendosurit brendapërbrenda.

“Vendet e Ballkanit Perëndimor duhet të punojnë më shumë për të sjellë të drejtat e njeriut në një linjë me standardet evropiane dhe ndërkombëtare”, ka thënë Lydia Gall, hulumtuese për Ballkanin dhe Evropën Lindore, pranë organizatës Human Rights Watch.

Sipas saj, Bosnja, Serbia dhe Kosova duhet të ndalojnë abuzimet serioze nëse vërtet synojnë të lëvizin më pranë Bashkimit Evropian.

 Në raport thuhet se prokurorët në Serbi dhe Bosnjë kanë nënshkruar një marrëveshje bashkëpunimi në vitin 2013 për ndjekjen penale të krimeve të luftës, krimeve kundër njerëzimit dhe gjenocidit, raporton INA.

Pavarësisht disa dënimeve, përgjegjësia për këto krime ka mbetur e padefinuar, me ndjekje të pakta penale në gjykatat kombëtare të të dyja vendeve, thuhet në raport. Po sipas tij, ndjekja e krimeve të luftës në Kosovë ka mbetur e ngadaltë dhe e dëmtuar nga problemet e mbrojtjes së dëshmitarëve.

Human Rights Watch thotë se mbrojtja e minoriteteve mbetet e dobët në gjithë rajonin. Organizata vë theksin mbi romët, të cilët, sipas saj, përballen me diskriminim të gjerë sa i përket qasjes në kujdesin shëndetësor, arsim dhe strehim, si dhe me dëbime të detyrueshme.

Në Kosovë, vijon raporti, diskriminimi kundër romëve dhe minoriteteve të tjera, të njohura si ashkali dhe egjiptianë, është përkeqësuar nga dëbimet e vazhdueshme nga Evropa Perëndimore, pa ndihmë adekuate për t’i ndihmuar këto grupe që të integrohen me pjesën tjetër të popullsisë.

Në raportin 667 faqesh, Human Rights Watch ka përmbledhur çështjet kryesore në më shumë se 90 vende.