Zgjedhjet në Maqedoni, takohen liderët shqiptarë në Shkup

Në prag të rrethit të dytë të zgjedhjeve presidenciale në Maqedoninë Veriore vëmendja është drejtuar te dy partitë shqiptare në opozitë, të cilat pritet që brenda këtyre dy ditëve të deklarojnë pozitën e tyre.

Mediet në Shkup raportuan se gjatë ditës janë takuar dy liderët, ai i Aleancës për Shqiptarët, Ziadin Sela dhe të Lëvizjes Besa, Bilall Kasami, bashkë me kandidatin që garoi në rrethin e parë, Blerim Reka.

Reka në një postim në rrjetet sociale ka thënë se nuk do të ndikojë në vendimin e qytetarëve në zgjedhje.

“Edhe sot po e përsëris atë që e thashë në fillim të fushatës sime, nuk do të lejoj tregtinë me vota. As unë, e askush tjetër nuk jemi shitblerës të votave tuaja, prandaj as nuk kemi të drejtë të ndikojmë në atë se për kë duhet të votoni këtë të diel. Tregtia me votat tuaja është kundër konceptit tim për Republikën, kundër sundimit të ligjit si shtyllë e saj dhe kundër demokracisë dhe lirisë së qytetarëve”, ka shkruar Reka, transmeton albinfo.ch.

Reka ka mohuar se ka pasur takime me kundërkandidatët apo me liderët partiakë të tyre lidhur me thirrjen e mundshme të qytetarëve për të votuar këtë ose atë kandidat presidencial.