Kosovë, veteranët bojkotojnë festën e pavarësisë

Ish-guerilët e pensionuar të UÇK-së nuk do të marrim pjesë në shënimin e 6-vjetorit të Pavarësisë, pas idesë për formimin e një tribunali gjyqësor për ish-UÇK-në

Të pakënaqur me zhvillimet e fundit politike, veteranët e ish- Ushtrisë Çlirimtare të Kosovës (UÇK) do të bojkotojnë aktivitetet që janë paraparë për shënimin e 6-vjetorit të pavarësisë së Kosovës. Kështu deklarojnë ish-guerilët e pensionuar në një komunikatë për media.

 

Ata kryesisht shprehen të pakënaqur me vendimin për të theluar një tribunal të veçantë për UÇK-në në Kosovë.

 

“Kërkojmë nga Qeveria që për asnjë çmim të mos kërkoj nga Bashkimi Evropian krijimin e ndonjë gjykate për krime lufte që nuk është pjesë e sistemit gjyqësor të Kosovës. Çdo tribunal që do funksionojë jashtë gjyqësorit të Kosovës, do të jetë i papranueshëm dhe denigrues për Shtetin e Kosovës”, thuhet në kumtesë.

 

Po ashtu veteranët thonë se nuk do të jenë pjesë e manifestimeve për 6-vjetor edhe për faktin, se qeveria i ka anashkaluar politikisht. “Ne kërkojmë nga Qeveria që sa më shpejt ta dërgojë për miratim në Kuvendin e Kosovës, Projektligjin për veteranët e luftës së UÇK-së”, thuhet në kumtesë.

 

Të dy këto çështje, sipas tyre, kanë ndikuar që veteranët të bojkotojnë manifestimet për përvjetorin e pavarësisë.

 

“Njoftojmë të gjithë veteranët e luftës, se nuk do të marrim pjesë në shënimin e 6-vjetorit të Pavarësisë të organizuar nga institucionet e Republikës së Kosovës, në shenjë pakënaqësie dhe revolte për padrejtësitë që po ju bëhen bashkëluftëtarëve tonë dhe mbajtjes së tyre prapa grilave bazuar në procese të montuara”, thuhet në reagim.

 

Ndryshe, disa ditë më parë është dhënë një ide që në Kosovë të formohet një trup e veçantë gjyqësore, një lloj tribunali, që do të merret vetëm me UÇK-në. Kjo gjykatë do t`i shqyrtojë ankesat dhe do të hetojë nëse ish-guerilët shqiptarë kanë bërë krime gjatë luftës së viteve 1998-1999.   

 

---