Agushi paralajmëron rekord të ri: Vozitje e veturës me top në kokë

Agim Agushi (Facebook)

Një ditë pasi theu një rekord në librin “Guinness”, profesori Agim Agushi, nga Vitia e Kosovës, ka paralajmëruar një rekord të ri, shkruan albinfo.ch.

Këtë herë, ai paralajmëron për një rekord pak më ndryshe në Dubai.

“Vozitje e veturës kabriolet me top në kokë. 5 kilometra. Prapë në Dubai. Më shumë se rekord botëror”, ka shkruar Agushi në Facebook.

Ndërkaq, gjatë ditës së djeshme rekordmeni kosovar Agushi, bashkë me Bujar Ajetin, shënoi një rekord të ri botëror, duke zhongluar topin me kokë në çift, në një afat kohor prej 35 minutash.

Në aktivitetin që u mbajt para Bibliotekës Kombëtare të Kosovës, Agushi e Ajeti bënë që emri i Universitetit të Prishtinës të shkruhet në librin e rekordeve botërore “Guinness”, shkruan albinfo.ch.

Në vitin 2015, këtë rekord e mbante po ashtu zhongleri Agim Agushi, por këtë herë me Leutrim Agushin.