Një familje shet shtëpinë për azil, mbetet pa strehë

Sakrifica e katër anëtarëve të familjes Hajdini përfundoi para pak ditësh, kur ata u kthyen në Kosovë. Ata kishin shitur shtpinë për të kërkuar azil

Në kërkim të një jete më të mirë, familja Hajdini nga Prishtina, tetë muaj më parë e kishte shitur shtëpinë dhe ia kishin mërsyer Evropës për të marrë azil. Mirëpo sakrifica e katër anëtarëve të kësaj familje përfundoi para pak ditësh, kur ata u kthyen në Kosovë, por tash pa kulm mbi kokë.

Kryefamiljari Bejtë Hajdini së bashku me gruan dhe dy fëmijët e tij, para tetë muajve u nisën drejt Hungarisë. Atje qëndruan dy muaj dhe më pas marshuan për në Austri ku i kaluan gjashtë muajt e fundit, derisa nga autoritetet austriake morën rekomandimin që shumë shpejt ta lëshoj vendin.  

Bejtë Hajdini thotë se iu refuzua kërkesa për azil, derisa iu kërkua që për një kohë të shkurtër ta lëshojë këtë vend dhe të kthehet në Kosovë si i riatdhesuar. Ai thotë se i është premtuar shumë nëse kthehet në Kosovë. Ai ankohet se Ministria e Brendshme nuk i ofroi ndihmën e premtuar.

Kjo familje që mbeti pa kulm mbi kokë, ashtu siç i takon edhe me Rregulloren 20/2013 për Riintegrimin të Personave të Riatdhesuar, kërkon t’i sigurohet strehimi. Por, sipas KTV, zyrtarë në Ministrinë e Brendshme të Kosovës, përgjegjëse për këtë proces, mohojnë se kjo familje ka bërë kërkesë për ndihmë.

Sipas informacioneve të kësaj ministrie, kjo familje nuk ka parashtruar asnjë kërkesë as në Zyrën komunale për komunitete dhe kthim në Prishtinë.

Ndryshe, si familja Hajdini ka edhe shumë familje të tjera që kanë shtëpinë ose banesën për të kërkuar një jetë më të mirë në BE. Përpjekjet e tyre shpeshherë kanë dalë të gabuara, pasi që zyrtarët e Bashkimit Evropian kanë thënë se më nuk ka azil për kosovarët.

Edhe autoritetet në Prishtinë kanë kërkuar që mos të shkohet në BE për azil, sepse aili i rremë është kancer për liberalizimin e vizave.