Burkhalter, për të drejtën e votës nga mosha 16 vjeçare

Aktualisht Glarusi është kantoni i vetëm që ua njeh të drejtën e votës të rinjve që kanë mbushur 16 vjet.

Presidenti i Federatës së Zvicrës, Didier Burkhalter është i mendimit se mosha 16 vjeçare është mosha e duhur për të rinjtë që të fitojnë të drejtën e votës. Këtë deklaratë ai e ka dhënë në një intervistë për gazetën “Schweiz am Sonntag”.

Ai është shprehur në favor të moshës 16 vjeçare si bazë për fitimin e të drejtës së votës. ”Me moshën më të re të votuesve mund të nxitet më shumë përgjegjësia te të rinjtë për integrimin e tyre në shoqëri”, ka thënë Burkhalter.

Por ai ka saktësuar se ulja e moshës për votim nuk duhet të vendoset në nivel të shtetit. Ajo do të ishte çështje të cilën do ta përcaktonin në radhë të parë instancat lokale dhe kantinave, bazuar në nevojat specifike të kantoneve të veçanta”.

Aktualisht Glarusi është kantoni i vetëm që ua njeh të drejtën e votës të rinjve që kanë mbushur 16 vjet. Në një numër kantonesh kërkesat në parlamentet përkatëse janë ndërprerë ose janë hedhur poshtë nga populli, me votim. Kështu ka ndodhur në kantonet: Cyrih, Bernë, Bazel, Baselland, St. Gallen, Aargau dhe Neuchatel.

Presidenti Burkhalter e ka bërë këtë propozim duke u nisur nga analizat lidhur me pjesëmarrjen e ulët të të rinjve në referendumin “Kundër migrimit masiv” më 9 shkurt. Sipas Vox analizës dilte se të rinjtë nga mosha 18-29 vjeçare kishin marrë pjesë në votim në shkallën prej vetëm 17%.