Nxënësit e shkollës shqipe shkëlqyen në turneun e futbollit “Flums 2019”

Të shtunën më 15 qershor 2019, në Flums të Kantonit të St. Gallenit u tubuan nxënësit e shkollave shqipe të të Flums-it, Mels-it, Rapperswil-Jonës, Ballgach-ut, Rebstein-it, Gossau-t,  Buchs-it, Neuenhof-it, Birr-it, Brugg-it, Uster-it, të cilët garuan për titullin e më të mirit.

Ky turne tradicional që zhvillohet vite me radhë edhe kësaj radhe tuboi më se 140 nxënës të cilët duke filluar nga ora 11:30 dhe deri në ora 16:00 zhvilluan disa lojëra mbresëlënëse. Turneun e hapi mësuesi i shkollës shqipe z. Vaxhid Sejdiu kurse përkujdesjen teknike kësaj radhe e kishte përsipër Këshilli prindëror i Sarganserlandit, të cilët u kujdesën me përkushtim për mbarëvajtjen e turneut.

Të gjitha ekipet e shkollave shqipe mbanin emra në gjuhën shqipe duke pasqyruar hartën e trojeve shqiptare. Edhe atë: “Bashkimi” – Uster, “Shkupi” – Flums I, “Kuq e Zi” – Flums II, “Kosova” – Neuenhof,  “Bashkimi” – Flums III, “AS”- Buchs, “Skënderbeu”- Birr, “Kumanova” – Mels, “Theranda” – Brugg, “Prishtina” – Ballgach, “Albania” – Rebstein dhe “Flamurtari” – Gossau.

Pas lojërave të njëpasnjëshme në  gjysmëfinale  kaluan katër ekipe:  “Kosova” – Neuenhof,  “Theranda” – Brugg, “Skënderbeu”- Birr dhe “Albania” – Rebstein.  Pas lojërave të gjysmëfinales në finalen e madhe luajtën ekipi “Theranda” – Brugg me ekipin “Albania” – Rebstein, në të cilën ekipi “Albania” – Rebstein zuri vendin e parë dhe për ekipin “Theranda” – Brugg mjaftoi vendi i dytë. I treti kaloi ekipi “Skënderbeu”- Birr dhe të katërtin :  “Kosova” – Neuenhof.

Vlen të përmendet se golashënuesi më i mirë ishte Freskim Ibrahimi dhe portieri më i mirë Erijon Dervishi.

Po ashtu për arsye se në garë kishte edhe nxënës shumë të vegjël të ciklit të ultë shkollor (nga klasa I-III) u ndanë edhe dy çmime për ta. Njërin e mori ekipi i shkollës shqipe të Uster-it dhe tjetrin ekipi i shkollës shqipe të Flumsit. Organizatori (shkolla shqipe e kantonit të St. Gallenit) ishte përkujdesur për të gjithë nxënësit që në këtë turne tradicional të ketë medalje.

Së bashku me nxënësit ishte edhe një numër i madh i prindërve të cilët i kishin shoqëruar fëmijët e tyre për këtë garë tepër festive dhe të mrekullueshme.

Gëzimi, hareja shihej në fytyrat e tyre që nga fillimi dhe  deri në përfundim të turneut.

 

---