Burkhalter i kënaqur me vizitën në Ballkan

Presidenti i Konfederatës së Zvicrës njëherësh kryesues i radhës i OSBE-së, Didier Burkhalter përshëndet progresin në bashkëpunim rajonal dhe pajtimin në Ballkan

Një ditë pas përfundimit të vizitës në Beograd, Tiranë dhe Prishtinë, presidenti i Konfederatës së Zvicrës dhe njëherit kryesuesi i radhës i OSBE-së, Didier Burkhalter, e vlerësoi të suksesshme turneun e tij diplomatik nëpër Ballkanin Perëndimor. Ai thotë se nga tri vendet mori mbështetje të fuqishme për OSBE-në.

 

Sipas një njoftimi që lëshim Zyra e Misionit të OSBE-së në Kosovë, Burkhalter u shpreh  i kënaqur me angazhimin e të gjithë liderëve politikë me të cilët u takua, në Beograd, Tiranë dhe Prishtinë, për të forcuar sigurinë dhe stabilitetin në Ballkanin Perëndimor përmes bashkëpunimit.

 

Ai, siç thuhet, gjeti mbështetje të fuqishme për objektivat e kësaj Kryesie në Ballkanin Perëndimor, e ato janë ofrimi i ndihmës së OSBE-së në procesin e udhëhequr nga BE për normalizimin e marrëdhënieve në përputhje me marrëveshjen mes Beogradit dhe Prishtinës.

 

“Kjo mbështetje parashikon përmirësimin e bashkëpunimit rajonal, duke përfshirë çështjet e migracionit, si dhe në avancimin e pajtimit, veçanërisht në lidhje me zgjidhjen e çështjes së personave të zhdukur”, thuhet në njoftim.

 

Për të mundësuar progres të mëtejmë në këto çështje, presidenti helvetik, i ftoi të gjitha palët që të vazhdojnë bashkëpunimin e ngushtë dhe të shkëlqyer me Përfaqësuesin e tij të Posaçëm për Ballkanin Perëndimor, ambasadorin Gerard Stoudmann.

 

Burkhalter shprehu mirënjohje për mbështetjen e autoriteteve në Beograd, Tiranë dhe Prishtinë për aktivitetet e OSBE-së për të ndihmuar Ukrainën në tejkalimin e krizës aktuale.

 

Sipas të njëjtit njoftim, ai shkëmbeu pikëpamjet me përfaqësues të pranive të OSBE-së në terren dhe theksoi vlerësimin e tij për punën e tyre të rëndësishme dhe profesionale. Ai gjithashtu vizitoi zyrën e Misionit të OSBE-së në Kosovë në Mitrovicë të Veriut dhe një projekt për ndërtimin e kapaciteteve të policisë lokale.

 

“Në takimet me të rinj shqiptarë në Tiranë, dhe një grup të rinjsh shqiptarë dhe serbë të Kosovës në Prishtinë, ai mirëpriti angazhimin e tyre për demokraci, të drejta të njeriut dhe shoqëri përfshirëse, duke i quajtur ata agjentë kryesor për pajtim në rajon”, përfundim komunikata e OSBE-së.

 

Ndryshe gjatë vizitës në Prishtinë, ai i takua me presidenten Atifete Jahjaga dhe me kryeministrin Hashim Thaçi. Presidenti i Konfederatës së Zvicrës, Didier Burkhalter tha se Kosova ka arritur progres të konsiderueshëm dhe Zvicra mbështet vizionin e Kosovës për të ardhmen.

 

Presidenti Burkhalter tha se bizneset zvicerane duan të bëjnë investime afatgjata në rajon dhe e konsiderojnë forcimin e rendit dhe ligjit si parakusht për një hap të tillë. Në kuadër të kryesimit të radhës të OSBE-së, presidenti Burkhalter shprehu gatishmërinë e OSBE-së që të lehtësojë procesin e zgjedhjeve të ardhshme në Republikën e Kosovës.

---