Zvicër: 10% më shumë kërkesa azili gjatë majit

Por, po u krahasua ky numër me atë të muajit maj të vitit 2018, kemi sërish një rënie të vogël

Numri i kërkesave të azilit në Zvicër gjatë muajit maj është rritur për 9.7 për qind në krahasim me muajin paraprak. Siç bën të ditur Zyra Federale për Migracion (SEM), azil në Zvicër gjatë majit kanë kërkuar 1226 veta ose për 108 më shumë se në prill. Por, po u krahasua ky numër me atë të muajit maj të vitit 2018, kemi sërish një rënie të vogël: janë regjistruar 42 kërkesa azili më pak ose ka pasur një rënie prej 3.3% të kërkesave në fjalë.

Lista e shteteve prej nga ka pasur më shumë kërkesa azili duket si vijon: Eritrea, ashtu si dhe në muajt dhe vitet e fundit, është në vendin e parë, me 289 kërkesa azili ose 44 më tepër se në prill; Azilkërkuesit nga Afganistani me 105 kërkesa, mbeten në shkallë të njëjtë me atë të shënuar një muaj më parë; sirianët kanë bërë 95 kërkesa për azil, numër ky që është për 35 më i madh se në prill. Nga shtetasit turq janë bërë 82 kërkesa azili ose 29 më shumë se një muaj më parë. Ndërsa nga Sri Lanka janë regjistruar gjithsej 74 kërkesa ose 37 më shumë se në prill.

SEM bën të ditur po ashtu se gjatë muajit maj ka zgjidhur në shkallën e parë 1834 kërkesa azili, transmeton albinfo.ch. Në këtë kontekst, janë marrë 339 vendime për mosdhënie azili (265 prej tyre mbi bazë të Marrëveshjes së Dublinit). 574 persona gjatë kësaj periudhe kanë fituar azilin dhe 430 të tjerë kanë fituar statusin e qëndrimit të përkohshëm në Zvicër (Viza F).

Numri i rasteve që akoma janë në procedurë të shkallës së parë është zvogëluar gjatë majit për 486 sish, duke rënë në 10551 raste të tilla.

---