Leona Krasniqi, krenaria shqiptare në garën për Miss Belgium 2026

E reja nga Antwerpeni synon të shkëlqejë në një nga konkurset më prestigjioze të bukurisë në Belgjikë

Nga Soni Memo

ANTWERPEN – Komuniteti shqiptar në Belgjikë ka një arsye të veçantë për t’u ndier krenar. Leona Krasniqi, një vajzë e talentuar dhe ambicioze me origjinë shqiptare, është përzgjedhur si kandidate në garën prestigjioze Miss Belgium 2026, ku do të përfaqësojë qytetin e Antwerpenit me kodin MA29.

E njohur për karakterin e saj të fortë, edukatën dhe përkushtimin ndaj objektivave që i vendos vetes, Leona po e shfrytëzon këtë mundësi jo vetëm për të realizuar një ëndërr personale, por edhe për të përfaqësuar me dinjitet komunitetin shqiptar në Belgjikë.

Në një kohë kur të rinjtë shqiptarë po arrijnë suksese në fusha të ndryshme të jetës shoqërore, profesionale dhe kulturore, pjesëmarrja e Leonës në Miss Belgium përbën një shembull frymëzues të integrimit, talentit dhe vetëbesimit.

“Jam shumë e lumtur dhe mirënjohëse për këtë mundësi. Për mua, Miss Belgium nuk është vetëm një konkurs bukurie, por edhe një platformë për të promovuar vlerat, kulturën dhe angazhimin e të rinjve në shoqëri. Mbështetja e komunitetit shqiptar do të thotë shumë për mua”, shprehet Leona Krasniqi.

Ndërkohë, familjarë, miq dhe bashkatdhetarë kanë nisur një fushatë sensibilizuese për ta mbështetur kandidaten shqiptare, duke ftuar të gjithë shqiptarët në Belgjikë dhe më gjerë që të votojnë për të.

“Leona përfaqëson më së miri energjinë, talentin dhe potencialin e vajzave tona. Ajo meriton mbështetjen e të gjithëve”, thonë të afërmit e saj.

Komuniteti shqiptar në Belgjikë ka dëshmuar vazhdimisht se di të bashkohet për të mbështetur sukseset e bashkatdhetarëve të vet. Këtë herë, vëmendja është përqendruar te Leona Krasniqi, e cila synon të bëjë një paraqitje dinjitoze në skenën kombëtare belge.

Si mund të votohet?

🔹 Online në platformën zyrtare të Miss Belgium.

🔹 Me SMS duke dërguar:

MA 29 në numrin 6665.

Çdo votë ka rëndësi dhe e afron Leonën një hap më pranë ëndrrës së saj për të fituar kurorën e Miss Belgium 2026.

Me mbështetjen e komunitetit shqiptar dhe të gjithë atyre që besojnë në talentin dhe potencialin e saj, Leona Krasniqi shpreson të shkruajë një histori të bukur suksesi dhe krenarie për të gjithë shqiptarët në Belgjikë.

---