Zvicra vazhdon mbështetjen edhe për Kuvendin e Maqedonisë

Kryeministri i Maqedonisë së Veriut, Zoran Zaev, ka pritur në një takim të përbashkët ambasadoren e Zvicrës në Maqedoni, Sybille Suter dhe Robert Scott Hejzlet, udhëheqësin e ekipit të programit për mbështetje parlamentare nga NDI, transmeton albinfo.ch.
Programi për mbështetje parlamentare i nënshkruar mes qeverisë zvicerane dhe Kuvendit të Maqedonisë ka për qëllim të forcojë kapacitetin e Parlamentit.
“Ne fuqimisht mbështesim këtë projekt dhe të gjitha aktivitetet që kanë për qëllim sigurimin e pavarësisë më të lartë të mundshme të Parlamentit”, ka thënë kryeministri Zaev.
Ai ka falënderuar Qeverinë e Zvicrës dhe Ambasadën zvicerane, e po ashtu NDI-në për mbështetjen në procesin e demokratizimit.
Ambasadorja Suter ka thënë se ky program do të sigurojë mbështetje për të forcuar kapacitetet e Kuvendit, e po ashtu transparencën dhe llogaridhënien ndaj qytetarëve.