Të huajt nga BE, 31 milionë franga në emër të papunësisë

Atyre u llogariten kontributet e paguara të papunësisë në vendet e tyre. Nga kjo mundësi përfitojnë shumë shtetas të këtyre vendeve.

Të huajt të cilët kanë punuar dhe kanë paguar kontributet së paku një vit gjatë dy viteve të fundit, kanë të drejtë të marrin të ardhura të papunësisë. Por megjithëkëtë po vjen duke u rritur numri i të huajve të cilët paraqiten për të përfituar nga këto të ardhura edhe pse kanë shumë pak kohë që kanë ardhur në Zvicër.

Por ajo që u mundëson të huajve që kanë shtetësi të vendeve të BE-së dhe EFTA-s të marrin të ardhura të papunësisë pa plotësimin e këtyre kushteve është se atyre u llogariten kontributet e paguara të papunësisë në vendet e tyre. Nga kjo mundësi përfitojnë shumë shtetas të këtyre vendeve.

Sekretariati  Shtetëror për Ekonomi (Seco) gjatë vitit 2014  u ka paguar 2313 personave me leje qëndrimi B ose me leje të shkurtë qëndrimi (L) para të papunësisë në mbështetje të kontributeve që ata kanë dhënë në fondet e vendeve prej nga vijnë.

Ky numër është për 550 më i madh se një vit më parë. Marrë në tërësi, të gjithë së bashku kanë marrë 31 milionë franga ose 10 milionë më shumë se në vitin 2012.