“Të tjerët do të ishin dorëzuar” thotë trajneri për Kukelin

Burim Kukeli ka pësuar para një viti e gjysmë dy thyerje në pjesë të ndryshme të këmbës, është operuar tri herë dhe ndodhej para përfundimit të karrierës

Një periudhë e rëndë, me shumë lëndime, dhimbje, me tri operacione të vështira, duket se ka marrë fund për Kukelin. Burimi sërish është mirë me shëndet. Ai, pas një viti e gjysmë më në fund u bë sërish pjesë e lojës së FCZ. Kësaj here bëhej fjalë për derbin e klubit të tij, FC Zürich kundër rivalit lokal Grasshoppers (GC). FCZ e ka fituar ndeshjen dhe merita për këtë fitore k edhe Kukeli.

“Fakti se Kukeli i është kthyer lojës ka qenë lajmi më i bukur i kësaj dite”, shkruan gazeta Tages Anzeiger në raportin e saj të zgjeruar nga ndeshja derbi e Cyrihut.

“Lojtari kosovar ka pësuar para një viti e gjysmë dy thyerje në pjesë të ndryshme të këmbës, është operuar tri herë dhe ndodhej para përfundimit të karrierës. `Të tjerët do të dorëzoheshin`e lavdëron trajneri Meier lojtarin e tij të guximshëm”. Ndërsa vetë Burimi thotë: “Ka qenë një periudhë e jashtëzakonshme vajtjesh që më ka kushtuar shumë me nerva. Por,  aq sa ka qenë e rëndë mungesa, për aq më shumë gëzohem që sërish mund shijoj aromën e barit në fushë të futbollit”.

Në ndeshjen që FCZ e ka fituar me rezultatin 1:0, Kukeli ka luajtur gjithë ndeshjen. Në ekipin fitues, nga shqiptarët ka luajtur edhe Xhimshiti ndërsa për GC gjithë ndeshjen e ka luajtur Amir Abrashi.