Zvicër: Dëme të mëdha nga moti i lig dhe vërshimet

Dëmet më të mëdha nga stuhia me shi janë regjistruar në kantonin e Bernës, në atë të Lucernit dhe në kantonet e Zvicrës Lindore

Moti i lig me shira të fuqishme po vazhdon prej sa ditësh në pothuaj gjithë Zvicrën. Në disa regjione ky mot ka shkaktuar dëme të konsiderueshme, ndërsa ndonjë përmirësim i shpejtë nuk pritet as në ditët e ardhshme të javës.

Dëmet më të mëdha nga stuhia me shi janë regjistruar në kantonin e Bernës, në atë të Lucernit dhe në kantonet e Zvicrës Lindore. Siç bën të ditur ndërmarrja publike hekurudhore SBB/CFF disa linja të saj janë ndërprerë nga shkaku i shirave. Njëra ndër to është ajo Luzern-Olten.

Po ashtu edhe Viasuisse, që përfaqëson trafikun rrugor e njofton të njëjtën gjë për një numër rrugësh, shkruan nzz.ch. Bodrumet e shtëpive të regjioneve në fjalë janë vërshuar nga uji ndërsa në disa raste uji ka hyrë edhe në katet përdhese të shtëpive.

Ndërkohë autoritetet e shtetit të Zvicrës e kanë zgjeruar paralajmërimin për rrezikun nga vërshimet edhe në kantonin e Tesinës dhe në atë të Juras.

Zjarrfikësit dhe policia janë në kujdestari të vazhdueshme për t`i ardhur nëndihmë popullatës.
Në kantonin e Cyrihut gjendja është nën kontroll dhe, nga liqenjt e këtushëm janë lëshuar të dielën, si masë preventive miliona kubikë ujë për t`u bërë vend reshjeve të reja.
Bazuar në ritmin me të cilin ka rënë shi gjatë ditës së djeshme pritet që deri nga mesdita e sotme (e martë) niveli i shiut në shumë regjione të arrijë ndërmjet 50 dhe 80 litra për metër katror.