Refuzohet ankesa e prindërve, fushata “Love Life”- e pastër

Gjykata Federale Administrative nuk sheh asnjë arsye për të cilën do të ndërpritej fushata. Sipas saj "zhvillimi i fëmijëve dhe të rinjve, nuk rrezikohet nga kjo fushatë"

Prindërit e 35 fëmijëve 7 deri 16 vjeçarë kishin ushtruar ankesë në Zyrën Federale për Shëndetësi (BAG) kundër fushatës aktuale për mbrojtje nga HIV, me titullin „Love Life“. Sipas tyre fushata duhej të ndalohej pasi që, siç thonë ata, ajo me pamjet që ofron është „e pashije“ dhe „fyese“.

Pasi që BAG nuk e ka pranuar ankesën, çështja ka shkuar në Gjykatën Federale Administrative. Kjo e fundit nuk sheh asnjë arsye për të cilën do të ndërpritej fushata në fjalë. Sipas përgjigjes me shkrim që ka dhënë ajo, zhvillimi i fëmijëve dhe të rinjve, nuk rrezikohet nga kjo fushatë.

Fushata „Love Life“ me pamjet në plakate dhe me videot përmes të cilave është prezantuar, ka nxitur mjaft reagime në opinionin publik. Shumë nga kritikët shohin në to „seksizëm“ ose madje edhe afërsi me pornografinë.