Kosova garon në festivalin prestigjioz “BFI London Film Festival 2019”

Regjisori i njohur Samir Karahoda, dërgon Kosovën në “BFI London Film Festival 2019”

Regjisori i njohur Samir Karahoda pas sukseseve të vazhdueshme në Industrinë filmike vendore e botërore, është pranuar në kategorinë garuese të festivalit prestigjioz “BFI London Film Festival 2019”, me filmin e tij dokumentar “Në Mes”, shkruan radioK4.

Filmi i takon kategorisë së filmave të shkurtër dhe është një nga 12 filmat e përzgjedhur për këtë çmim, që i dedikohet filmave që kanë një trajtim të veçantë kinematografik dhe një trajtim të sigurt të temës dhe të përmbajtjes.

Ky festival prestigjioz  do të mbahet nga 2 deri më 13 tetor, në Londër,

Filmi do t’i prezantohet audiencës Londineze përmes 3 shfaqjeve në seksionet “Debate” dhe “Prezantime Speciale”, atje ku do të paraqiten filmat më të mirë të botës.

Filmi “Në Mes” është prodhim autentik nga Kosova dhe është realizuar me mbështetje të Qendrës Kinematografike të Kosovës, Bankës për Biznes, Komunës së Prizrenit dhe Prishtinës, përcjell albinfo.ch.

---