Ekspertët: Nuk ka bazë për panik nga ebola në Zvicër

Personeli është i trajnuar mirë për të reaguar dhe është i njohur me situatat e karantinës. Prandaj sa i përket Zvicrës, paniku është i pabazë

Qeveria e Zvicrës do të organizojë një tryezë të rrumbullakët lidhur me epideminë Ebola. Kjo do të shërbejë për transferimin e dijes në mes të spitaleve më të mëdha të Zvicrës. Kështu ka thënë për mediet udhëheqësi i taskforcës së krijuar për luftimin e epidemisë së përmendur, në kuadrin e  Zyrës Federale për Shëndetësi (BAG).

Deri më tash për pjesëmarrje në këtë tryezë janë paraqitur  mjekë dhe ekspertë nga 12 spitale të mëdha. Fedreata mer me këtë rast një rol ndërmjetësues, për faktin se shëndetësia në Zvicër është e organizuar në nivel kantonesh. Në rast dyshimi për infektim me Ebola, BAG do të koordinojë me spitalet e prekura pranimin e pacientëve.   

Sipas imunologut nga Berna Beda M. Stadler spitalet zvicerane janë të përgatitura për qasjen me epideminë e përmendur. Ai thotë se personeli është i trajnuar mirë për të reaguar dhe është i njohur me situatat e karantinës. Për këtë arsye ai ka thënë se, sa i përket Zvicrës, ngritja e panikut është plotësisht e pabazë.

Veç tjerash edhe për faktin se standardi i higjienës në Zvicër, edhe si rezultat i dallimeve kulturore, është shumë më i lartë se në Afrikë. Sipas tij, në Afrikë njerëzit janë ndarë prej të vdekurve nga ebola me përqafime dhe puthje… “Cilido grip është më i rrezikshëm se ebola”.