Britania kërkon kuota për emigrantët

Deputetë, si konservatorë ashtu edhe laburistë, janë deklaruar për shtrëngimin e kontrolleve në kufijtë e Britanisë, pasi qeveria po dështon në frenimin e numrit të emigrantëve që vijnë në Britani

Kryeministri britanik, ndërkohë ka deklaruar se çështja e kuotave të emigrantëve që do të vijnë nga vendet e varfra të BE-së dhe veçanërisht për vendet që do të anëtarësohen në të ardhmen do të jetë në qendër të negociatave të tij me udhëheqësit e Brukselit në kuadër të shmangies ose jo të referendumit të planifikuar për të ardhmen e Britanisë në Bashkimin Evropian.

Çështja e emigracionit pritet të jetë në qendër edhe të fushatës së ardhshme elektorale të konservatorëve që ndodhen përballë një beteje të vështirë për rikonfirmimin në pushtet në zgjedhjet e majit të ardhshëm.

Cameron kërkon të vendosë kuota për numrin e atyre që do të vijnë për të punuar dhe jetuar nga vendet aspirante për të hyrë në BE.

Ndërkaq, sipas Top Channel, numri i shqiptarëve që vijnë në Britani vazhdon të jetë i lartë. Janë të shumtë të rinjtë dhe femrat që kërkojnë azil për gjakmarrje, orientimin seksual, apo për prostitucion.

Së fundmi, ka rritje të numrit të të rinjve që pretendojnë se vijnë nga familje me prindër fanatikë fetarë, që kërkojnë t’i indoktrinojnë dhe t’i detyrojnë ata të shkojnë të luftojnë në Siri.