Presidenti i Maqedonisë, Ivanov, për vizitë në Zvicër

Zvicra mban marrëdhënie diplomatike me Maqedoninë që nga viti 1994. Ajo merr pjesë në projekte zhvillimore bilaterale prej më shumë se njëzet vitesh

Të mërkurën, më 15 tetor, presidenti i Federatës së Zvicrës, Didier Burkhalter ka pritur presidentin e Maqedonisë, Gjorge Ivanov në një vizitë zyrtare që ai po i bën Zvicrës. Në qendër të bisedimeve kanë qenë angazhimi i Zvicrës në kuadrin e kryesimit nga ana e saj të OSBE-së, zhvillimet politike në Ballkanin Perëndimor dhe në Uikrainë si dhe marrëdhëniet bilaterale.

Dy homologët kanë vlerësuar lartë marrëdhëniet intensive në mes të dy vendeve që mbështeten po ashtu edhe në një gërshetim lidhjesh personale në mes të dy vendeve. Në Zvicër jetojnë reth 90 mijë veta me prejardhje nga Maqedonia, thuhet në komunikatën e Departamentit të Punëve të Jashtme të Zvicrës.

Presidenti Burkhalter gjatë bisedës ka përkujtuar mbështetjen shumëvjeçare të Zvicrës për transformimin e Maqedonisë në një shtet demokratik me ekonomi tregu si dhe në kuadrin e përpjekjeve të afrimit të saj me BE-në.

Zvicra mban marrëdhënie diplomatike me Maqedoninë që nga viti 1994. Ajo merr pjesë në projekte zhvillimore bilaterale prej më shumë se njëzet vitesh. Nga viti 1996 Maqedonia është një ndër shtyllat e bashkëpunimit të Zvicrës me vendet e lindjes. Në strategjinë aktuale të kooperimit  2013-2016 parashihen 85 milionë franga që do të jepen si mbështetje për procesin e reformave  në fushën e decentralizimit, ekonomisë, furnizimit me ujë dhe mbrojtjes së natyrës.

Situata politike në Ballkanin Perëndimor ka qenë tema tjetër e bisedës. Marrë parasysh rolin e saj si kryesuese e OSBE-së, për këtë vit Zvicra angazhohet me prioritet për marrëdhënie stabile, pajtim dhe bashkëpunim. 

Tema e cila po ashtu është rrahur në takimin Burkhalter-Ivanov ka qenë roli i OSBE-së në arritjen e paqes në Ukrainë. Presidenti i Zvicrës ka falënderuar homologun e tij maqedonas për mbështetjen që vendi i tij i ka dhënë misionit të OSBE-së në Ukrainë, thuhet në komunikatën e Departamentit të Punëve të Jashtme te Zvicrës.