Fushata e Kadri Veselit krahasohet me atë të Escobarit, nga Vetëvendosja

Lëvizja Vetëvendosje, fushatën e kundër korrupsionit të ish-kryeparlamentarit Kadri Veseli e ka quajtur kopje të fushatës së narkotrafikantit kolumbian Pablo Escobar në vitin 1982.

Ish-deputeti i Lëvizjes Vetëvendosje, Liburn Aliu, në emisionin Debat Plus në rtv Dukagjini, në debat me ministrin në largim të PDK-së, Abelard Tahirin, fushatën e kreut të PDK-së e ka krahasuar me at të Escobarit, raportojnë mediat kosovare, përcjell albinfo.ch.

“Për mua kjo është një fushatë e kopjuar, më 82 në Kolumbi Pablo Escobar në thelb të fushatës së tij ka pasur luftimin kundër krimit dhe korrupsionit”, tha Aliu.

Sipas tij, pikërisht Ligji për Konfiskimin e Pasurisë, për të cilin ‘mburrej’ ministri Tahiri, e vërteton edhe më shumë këtë kopjim të fushatës.

E një deklarim të ngjashëm për fushatën e Veselit e ka bërë edhe kandidati tjetër i VV-së për deputet, Yll Rugova, i cili përmes një postimi në Facebook, duke cituar fjalimin e Veselit dhe të Escobar, është përkujdesur të tregojë se sa të ngjashme janë këto fushata.

Tash e disa muaj që kreu i PDK-së, njëherësh edhe kandidati për kryeministër nga kjo parti, ka filluar një ‘betejë’ kundër korrupsionit.

---