Vriten dy gra dhe plagoset rëndë një burrë

Vrasja e parë e një gruaje është bërë rreth orës 13.30. Pak më vonë edhe një grua është vrarë në një lagje tjetër ndërsa një burrë ka marrë plagë me rrezik për jetën

Edhe një rast tjetër i rëndë vrasjeje, pas atij të Wilderswil-i (Bernë) ka tronditur qytetarët e Zvicrës. Kësaj radhe ka ndodhur të hënën në Bazel, ku  një person ka vrarë dy femra brenda një periudhe prej më pak se tri orësh. Dy vrasjet kanë ndodhur në një hapësirë prej disa qindra metrash distancë. Prokuroria konsideron se vrasjet janë kryer nga i njëjti person.

Vrasja e parë është bërë në një shtëpi ku banojnë disa familje. Pak më vonë në Bazel u përhap lajmi se edhe një grua është vrarë në një lagje tjetër dhe se një burrë ka pësuar lëndime të rënda dhe ndodhet në rrezik për jetë.

Më vonë, pasdite, policia ka rrethuar një ndërtesë banimi ku, rreth orës 17 ka mundur ta arrestojë personin i cili konsiderohej si i dyshuar për vrasjet, thotë prokuroria e përgjithshme. Ndërkaq, kjo prokurori ende nuk ka dalë me të dhëna për identitetin e dorasit dhe të viktimave si dhe as për motivin. Informatat e mëtejshme është paraparë të jepen pasditen e të martës.

Prokuroria ka ngritur një komision të madh special për të bërë hetimet. Ajo po ashtu kërkon ndihmën e dëshmitarëve të mundshëm.

Ngjarja ka tronditur rëndë qytetarët e Bazelit. Disa banorë të lagjes, të cilët e kanë njohur vrasësin e dyshuar ,flasin për një person  rreth 23 vjeçar, të konsideruar edhe më parë si njeri me rrezikshmëri të lartë për rrethin.