Kapen 39 kosovarë në një “kombi” duke hyrë ilegalisht në Gjermani

39 persona, të gjithë nga Kosova: burra, gra e fëmijë ishin vendosur në hapësirën e ngushtë të mikrobusit Mercedes Sprinter

Të shtunën, policia doganore e Gjermanisë me rastin e kontrollimit të një mikrobusi (“Kombi”) në një vendparkim në autostradën A 3 afër Hengersberg-ut, ka hasur në një rast të rëndë të futjes ilegale të të huajve në Gjermani.

39 persona, të gjithë nga Kosova: burra, gra e fëmijë ishin vendosur në hapësirën e ngushtë të mikrobusit Mercedes Sprinter. Të gjithë ata: 14 burra, 9 gra dhe 16 të mitur në mes 3 e 15 vjeçarë, ishin pa dokumente valide . Dy kontrabandistët, njëri gjerman (33) dhe tjetri bullgar (45) janë arrestuar dhe ndaj tyre kane filluar hetimet.

39 klandestinët janë strehuar në një qendër hetimesh në Hengensberg, ku është bërë përpunimi i të dhënave të tyre dhe janë vënë nën përkujdesje të autoriteteve policore, shkruan wochenblatt.de. Pas kësaj faze, ata, me një autobus pritet të dërgohen në Qendrën e Pranimit të Azilkërkuesve në Munih.

Dy trafikantët, me kërkesën e prokurorisë i janë dorëzuar gjykatës në Deggendorf, e cila do të vendosë mbi masat ndëshkuese që do t`u shqiptohen.