Emigrantët duhet të flasin vetëm gjermanisht

Një ligj i çuditshëm, i propozuar së fundi, detyron emigrantët që duan të qëndrojnë në Gjermani të flasin vetëm gjermanisht në shtëpi dhe në publik.

Këtë e kanë propozuar partnerët e koalicionit qeverisës të drejtuar nga Angela Merkel, Bashkimi Kristian–Social.

“Njerëzit që duan të qëndrojnë këtu përgjithmonë detyrimisht duhet të flasin gjermanisht në publik dhe brenda familjes”, thuhet shprehimisht në këtë paket ligjore.

Propozimi vjen në një kohë kur numri i emigrantëve në Gjermani ka shënuar rritje të ndjeshme dhe si një masë që mendohet se do të “pengojë” prurjet në të ardhmen.

Shumica e tyre janë nga vendet lindore që janë pjesë e BE-së, si Polonia, Rumania dhe Bullgaria. Të shumtë janë edhe ata nga Siria që i largohen luftës.