Gripi i Derrit rishfaqet në Kosovë

Edhe pse mjekët infektologë thotë se nuk ka shenja për panik, megjithatë ky grip ka dhënë shenja të rishfaqjes në Kosovë. Një person raportohet se ka vdekur nga ky virus

Një person ka vdekur dhe disa të tjerë janë të hospitalizuar në Klinike Universitare në Prishtinë, të sulmuar nga gripi AH1N1, i njohur si Gripi i Derrit. Edhe pse mjekët e infektologjisë thotë se nuk ka shenja për panik, megjithatë ky grip ka dhënë shenja të rishfaqjes në Kosovë.

Shefi i Klinikës Infektive, Hamdi Ramadani tha se pacienti që ka vdekur dy ditë më parë, ka lapsu edhe komplikime të tjera shëndetësore dhe nuk është vërtetuar se ka vdekur nga gripi AH1N1.

“Ky i sëmurë ka qenë i sëmurë qysh herët nga sëmundjet e zemrës dhe po ashtu ka pasur probleme të mëhershme në mushkëri, por që nuk është vërtetuar që ka qenë i infektuar ose i prekur nga virusi i derrit”, thotë Ramadani, citon KP, duke kërkuar që mos të bëhet panik në opinion.

Megjithatë, përkundër kësaj deklarate, mediet në Prishtinë kanë raportuar se një qytetarë nga Ferizaj ka vdekur si pasojë e Gripit të Derrit. E deklarata e mjekut ka qëllimin që mos të bëhet panik pa nevojë.

Mjeku i infektivës kujton se në rast nevoje për të trajtuar raste të tillë, Klinika Infektive është e gatshme të ofrojë shërbimet spitalore. Ai tha se Klinika Universitare posedon kapacitete të plota në të gjitha aspektet, edhe sa iu përket medikamenteve.

Ndryshe, sot është vërtetuar se një person, nga tetë që aktualisht po trajtohen në Klinikën Infektive, është vërtetuar se është prekur nga virusi AH1N1. Për shtatë të tjerët, ende priten disa rezultate, por që aktualisht janë në gjendje të mirë shëndetësor, madje pritet të lirohen nga klinika për në shtëpi.

Ndryshe, Gripi i Derrit nuk dallon shumë nga ai sezonal, edhe pse pasojat e tij janë dukshëm më të rënda.

Vetëm gjatë dekadës së fundit, Kosovën e kanë goditur disa lloj virusesh të  cilët kanë marrë dhjetëra jetë njerëzish, siç ka qenë: Gripi i shpezëve, pickimi i rriqrave (virusi krime kongo), bruceloza, Gripi i Nilit Perëndimor. Më me fatalitet ka qenë Gripi i derrave dhe pickimi i rriqrave.