Kosovë: Deri në gjysmë të nëntorit nuk ka targa të automjeteve

Qytetarët e Republikës së Kosovës po përballen me mungesë të targave të automjeteve.

Një qytetare e Kosovës ka kontaktuar me mediat atje dhe ka thënë se më shumë se një javë e ka veturën në Doganë për shkak të mungesës së targave.

Për këtë çështje, Indeksonline ka kontaktuar me Ministrinë e Punëve të Brendshme, nga e cila kanë njoftuar se tani është shpallur kompania fituese për furnizim me targa.

Në përgjigjen e dërguar thuhet se deri më 25 nëntor nuk do të kenë mundësi të marrin targa të reja, përcjell albinfo.ch.

Kjo pasi që duhet të përfundojnë të gjitha procedurat që kërkohen për nënshkrimin e kontratës.

“Ministria e Punëve të Brendshme e Republikës së Kosovës njofton të gjithë qytetarët e Republikës së Kosovës se është shpallur kompania fituese për furnizim me targa.

Ju njoftojmë se pas përfundimit të gjitha procedurave që kërkohen, pas nënshkrimit të kontratës që do të bëhet me datë: 19.11.2019, qytetarët nga data 25 nëntor mund të drejtohen te Qendrat për Regjistrim të Automjeteve në të gjitha komunat e Kosovës, që të pajisen me targa”, kanë thënë nga MPB.

MPB ka kërkuar falje nga të gjithë qytetarët që gjatë kësaj periudhe kohore nuk kemi mundur t’i furnizojmë me targa.