Të ardhurat nga “Turneu i Pavarësisë” në Vjenë, për të dëmtuarit nga tërmeti

Këtë vit, turneu kishte karakter humanitar, për të ndihmuar qytetarët e Shqipërisë për rimëkëmbje pas tërmetit që ndodhi në fund të vitit e kaluar në Shqipëri

Në kuadër të festës së Pavarësisë së Kosovës, të dielën në Vjenë u organizua një turne futbolli i cili mban emrin: “Turneu i Pavarësisë”, raporton “albinfo.ch”.

Turneu i organizuar nga Liga Shqiptare e Futbollit në Austri, i kushtohet pikërisht ditës së Pavarësisë së Republikës së Kosovës, traditë kjo tash e sa vjet.

Në këtë turne morën pjesë 16 ekipe, të cilat shfaqën cilësi të lartë sportive dhe disiplinë.

Këtë vit, turneu kishte karakter humanitar, për të ndihmuar qytetarët  dhe qeverinë shqiptare për rimëkëmbje pas tërmetit që ndodhi në fund të vitit e kaluar në Shqipëri, thuhet në njoftimin e LSHFA-së.

“I falënderojmë të gjithë kontribuuesit që mbështetën këtë organizim, të cilët, në shuma dhe mënyra të ndryshme bashkuan vullnetin për të ndihmuar popullin shqiptar”, thuhet në njoftimin e LSHFA-së.

Ndër ekipet që kaluan në gjysmëfinale ishte “AC Shqiponja”, fitues i turneut, përcjellë me vendin e dytë nga “Frizer Ludi”, fati i të cilit u vendos me penallti. Kurse vendin e tretë e fitoi ekipi “Wienger CF” që po ashtu me penallti fitoi nga “FC Timi”, kampion i trefishtë në Ligën Shqiptare të Futbollit në Austri.

Turneu u ndoq nga shikues të shumtë, në mesin e tyre edhe nga stafi i albinfo.ch.

---