“Maskat mbrojtëse në spitalin e Bernës po vidhen brenda 5 minutash”

Qofshin maska ​​mbrojtëse apo mjete dezinfektuese: Vizitorët e shqetësuar nga koronavirusi po i vjedhin me të madhe ato në spitalet zvicerane

Spitalet po zhfrytëzohen gjithnjë e më shumë si një pikë shpërndarjeje falas e maskave, shkruan 20minuten.ch.

“Në të vërtetë, në ditët e kaluara, përdorimi i maskave mbrojtëse ka qenë më i lartë se sa pritej. Sidoqoftë, nuk është depoja e spitalit ajo që po preket, por zonat të cilat janë të qasshme përpublikun në spital ”, thonë në Spitalin e Qytetit “Triemli”, në Cyrih, transmeton albinfo.ch. Për pasojë, edhe pse nuk janë dokumentuar vjedhje, maskat ​​mbrojtëse nuk janë më në dispozicion të publikut.

Por në Spitalin “Insel” të Bernës, nga ana tjetër, flitet hapur për vjedhje nga ana e vizitorëve: “çdo pako me maskë që ne vendosim, vidhet brenda pesë minutave”, thotë Philipp Jent, mjek kryesor për sëmundjet infektive.

Ky problem është i njohur edhe në Bazel, përcjell albinfo.ch. “Në fakt, ne po shohim një rënie të konsiderueshme të maskave dhe dezinfektuesve. Maskat janë në dispozicion vetëm në ambientet e pritjes, por ka njerëz që vijnë dy ose tri herë, kërkojnë maska ​​edhe pse kurrë nuk hyjnë në spital, “thonë në spitalin universitar të Bazelit.

“Kemi pasur raste të njerëzve që shfaqeshin me një enë, e mbushnin atë tek shpërndarësi ynë i mjeteve dezinfektuese dhe largoheshin përsëri. Ne do t`i mbajmë në vëmendje dukuritë e tilla”.

Në Spitalin Kantonal të St. Gallenit, gjithashtu, ka ndodhur që vizitorët dhe pacientët të merrnin maska ​​me vete kur dilnin nga dhoma e urgjencës, transmeton albinfo.ch. “Sigurisht që kjo gjë nuk është në rregull,” thotë zëdhënësi i spitalit,  Philipp Lutz.

---