Shërohet personi i dytë nga virusi HIV

Një burrë nga Londra është bërë personi i dytë në botë që është shëruar nga virusi HIV, thonë mjekët.

Personi i quajtur Adam Castillejo ende nuk ka shenja të këtij virusi në gjak, më shumë se 30 muaj pasi e ndërpreu marrjen e terapisë anti-retrovirale, e cila përdoret nga njerëzit e infektuar me HIV.

Megjithatë, ai nuk është shëruar përmes ilaçeve që përdoren kundër avancimit të HIV-it, por përmes trajtimit me qeliza, të cilin e kishte marrë për shkak të kancerit nga i cili vuante.

Dhuruesit e qelizave amë e kanë një gjen të pazakontë, i cili u ofron mbrojtje nga HIV-i, shkruan “BBC”.

Në vitin 2011, Timothy Brown, i njohur si “Pacienti i Berlinit”, ishte bërë personi i parë që është shëruar nga HIV-i, tre vjet e gjysmë pas marrjes së një trajtimi të ngjashëm.

Transplantimi i qelizave amë duket se e ndalon aftësinë e virusit që të shumohet brenda trupit përmes zëvendësimit të qelizave imunitare të pacientit me qelizat e dhuruesit, të cilat i rezistojnë infektimit me HIV.

Pacienti i Londrës para një viti ishte shpallur pa virus dhe tash ndodhet përsëri në të njëjtën gjendje dhe me shëndet të mirë.

---