BE heq bllokadën: Së shpejti në Zvicër do të ketë mjaft maska mbrojtëse

Bashkimi Evropian tani ka udhëzuar vendet anëtare që të mos bllokojnë eksportet e materialit mbrojtës në Zvicër

Së shpejti në Zvicër do të ketë sërish në shitje maska për mbrojtjen e frymëmarrjes, doreza dhe syzet mbrojtëse, shkruan srf.ch. Këtë njoftim e dhanë sot  përmes Twitterit presidentja federale, Simonetta Sommaruga dhe ministri i Ekonomisë, Guy Parmelin.

Bashkimi Evropian tani ka udhëzuar vendet anëtare që të mos bllokojnë më eksportet e materialit mbrojtës në Zvicër, transmeton albinfo.ch. Megjithatë rreth kësaj nuk ka asnjë konfirmim nga BE-ja.

Presidentja e Komisionit të BE-së, Ursula Von der Leyen, ka njoftuar disa ditë më parë se BE po kufizon eksportin e pajisjeve mbrojtëse mjekësore për shkak të krizës së koronavirusit. Maskat për mbrojtjen e frymëmarrjes mund të eksportohen në vendet që nuk janë anëtare të BE-së vetëm me leje të qartë, qe thënë ato ditë.

Siç është shkruar tashmë edhe në albinfo.ch, materialet për mbrojtje nga koronavirusi, në veçanti maskat dhe dezinfektuesit, qenë “zhdukur” nga farmacitë dhe drogeritë që në ditët e para të paraqitjes së virusit. Furnizimin me maskat e përmendura e vështirëson edhe më shumë fakti se shumica e madhe e tyre prodhohen në Kinë, ku dhe nevoja për to ishte më e madhe pasi që atje kishte shpërthyer për herë të parë epidemia e koronavirusit.

---