Mali i Zi, ashtu si Kosova, asnjë rast të ri me koronavirus brenda 24 orëve

Mali i Zi dhe Kosova, me zero raste me Covid-19

Lajme të mira vijnë nga Mali i Zi, i cili ka konfirmuar se nuk ka asnjë person të infektuar me koronavirus, ngjashëm sikurse Kosova, transmeton albinfo.ch.

24 maji është dita e parë pas 13 marsit, kur rezultuan rastet e para me COVID-19, ku nuk rezulton asnjë i infektuar nga testimi në Kosovë.

Ndërkohë edhe Mali i Zi ka treguar të njëjtat rezultate me zero të prekur në 24 orët e fundit.

“Pas 68 ditësh që nga rasti i parë, Mali i Zi aktualisht është pa pacientë me COVID-19”, ka njoftuar përmes një postimi në rrjetin social Twitter, Instituti i Shëndetit Publik në Mal të Zi.

Autoritetet kanë njoftuar se së fundmi janë kryer 140 teste për koronavirus dhe asnjë nuk ka dalë pozitiv.

“Ndërkohë rasti i fundit aktiv me COVID-19 i ka plotësuar kriteret për shërim të plotë”, thuhet në njoftim.

Instituti bëri me dije se numri i përgjithshëm i pacientëve që nga fillimi i epidemisë ka qenë 324. /Albinfo.ch

---