Zvicra ka rezervuar 4.5 milionë vaksina: OBSH e kritikon për monopol

Organizata Botërore e Shëndetësisë (OBSH) kritikon këtë sjellje të Zvicrës dhe të vendeve tjera të pasura sepse mund të krijojë pengesa në shpërndarjen e drejtë dhe të bazuar në nevoja të vaksinave

Zvicra po investon në blerjen paraprake të vaksinës kundër koronavirusit. Ajo tashmë ka porositur 4.5 milionë doza nga prodhuesi farmaceutik “Moderna” i SHBA-së.

Njëkohësisht Zyra Federale e Shëndetit Publik (BAG) është në negociata me prodhues të tjerë të vaksinave, thuhet në një editorial të shtëpisë mediale, Tamedia.

Por Organizata Botërore e Shëndetësisë (OBSH) kritikon këtë sjellje të Zvicrës dhe të vendeve tjera të pasura sepse mund të krijojë pengesa në shpërndarjen e drejtë dhe të bazuar në nevoja të vaksinave.

Ndërkaq, krahas kësaj, Qeveria Federale ka vendosur të kontribuojë edhe me 10 milionë franga të tjera në fushatën ndërkombëtare “Covax” (COVID-19 Vaccine Global Access Facility), transmeton albinfo.ch. Më heret i kishte zotuar 20 milionë franga.

“Covax” i ka vetes vetes qëllimin e zbatimit të rregullave për shpërndarjen e barabartë të vaksinave. Qëllimi është të parandalojë vendet e pasura të pretendojnë të gjitha rezervat e vaksinave të disponueshme për veten e tyre.

Sidoqoftë, gjendja nuk pritet të jetë sikur ajo e vitit 2009: Megjithëse në atë kohë kishte një vaksinë kundër gripit të derrit, shumica e popullsisë së botës nuk kishte qasje në të, përcjell albinfo.ch. Kjo pati ndodhur pasi disa vende të pasura patën monopolizuar tregun. Fushata ndërkombëtare “Covax” dëshiron ta parandalojë këtë.

Zvicra po investon gjithsej 30 milionë franga në “Covax”. Në përgjithësi Qeveria e Zvicrës planifikon të shpenzojë 309 milionë franga me synim vaksinimin e 60 për qind të popullsisë zvicerane.

 

---