“Vijojmë vaksinimin në Arenën Kombëtare me stafet mjekësore. Do të vijojmë edhe të shtunën e të dielën me stafet mjekësore dhe të moshuarit mbi 80 vjeç, sipas fashave. Janë rreth 11 mijë vaksinime të kryera deri tani, ndërsa vijojmë të zgjerohemi në territor, duke hapur sot qendrën e vaksinimit në Kukës dhe brenda javës, në Korçë”, është shprehur ajo. “Javën tjetër do të vijë dërgesa e radhës nga ‘Pfizer’. Me ardhjen e vaksinave, sipas kalendarit të kontratës që kemi lidhur me ‘Pfizerin’, ditën e hënë do të vijojmë të intensifikojmë dhe të shtrijmë në vijim vaksinimin. Gjithashtu pritet që në 10-ditëshin e parë të marsit, të kemi edhe një dërgesë të parë nga kontrata me Covax-in. Janë planifikuar rreth 14,400 doza, të cilat priten që të vijnë nga kjo marrëveshje e lidhur dhe e parapaguar nga qeveria shqiptare”.

Kohëve të fundit në Shqipëri ka pasur rritje të rasteve të reja. Për këtë, mjekët shqiptarë të diasporës kanë dhënë alarmin se Shqipëria po kalon atë që e kaloi Lombardia në Itali një vit më herët, me situatën që po vazhdon të rëndohet. Për këtë qëllim, doktoresha Elona Cekani në Zvicër dhe disa kolegë të tjerë i kanë dërguar një letër kryeministrit Edi Rama, presidentit Ilir Meta dhe krerëve të shtetit me rastin e zgjedhjeve të 25 prillit, të kontribuojnë në zbatimin e masave anti-Covid. Letra është firmosur nga 440 mjekë nga diaspora dhe nga Shqipëria.