Policia e Cyrihut paralajmëron për certifikatat e rreme të vaksinave Covid-19

Fletushka që qarkullojnë në Cyrih premtojnë karta vaksinimi mashtruese për një tarifë prej 99 frangash në vend të çmimit zyrtar prej 169 frangash. Pagesa duhet të bëhet në Bitcoins, transmeton albinfo.ch.

Fletushkat që vendosen në kuti postare private thonë se atyre që paguajnë do t’u lëshohen dokumente që vërtetojnë se ata kanë marrë vaksinim kundër Covid dhe për këtë arsye janë të imunizuar ndaj virusit.

Autorët pretendojnë se çertifikata do t’u japë të drejtën mbajtësve të “më shumë privilegjeve”.

Policia tha se hetimet mbi identitetin e autorëve janë duke u zhvilluar, duke shtuar se kushdo që blen dhe përdor këto certifikata të rreme do të jetë përgjegjës për ndjekje penale. /Albinfo.ch