Në ditën e parë të hapjes, mungoi “sulmi masiv” drejt tarracave

Moti pranveror, me shumë diell, i paralajmëruar për ditët në vijim, pritet ta ndryshojë këtë gjendje

Dita e parë me tarracat e hapura rishtasi të restoranteve ka rrjedhur me një ritëm të qetë. Në shumë vende, nuk u regjistrua ndonjë nxitim i madh, pas zbutjes, shkruajnë mediat zvicerane.

Moti pranveror, me shumë diell, i paralajmëruar për ditët në vijim, pritet ta ndryshojë këtë gjendje.

Vizitorët lakmonin  veçanërisht ato restorante që ofronin një vend nën diell, siç mund të shihet edhe në qytetin e vjetër të Cyrihut.

Në Winterthur, një numër klientësh të kafeneve ishin ulur në hapësirat e jashtme të lokaleve të posahapura. Sidoqoftë, i ftohti ka zbehur deri diku atmosferën e hapjes, trasnmeton albinfo.ch.

Të mbështjellë me rroba dimri dhe me batanijet e shpërndara nga lokalet, ata janë ngrohur duke shijuar kafenë e shërbyer në filxhana.

Ndërkaq, gjendja ishte shumë më e gjallë në qendrat e fitnesit. Në studion e Fitnesit Migros në Winterthur, për shembull, që para orës nëntë po ushtronin rreth 50 njerëz.

Ndryshe nga Winterthuri, vrapimi drejt tarracave të jashtme në Thun BE ishte i konsiderueshëm, përcjell albinfo.ch. Paradite, në orën 11.30 gjysma e shheshit Mühleplatz ishte tashmë plot me mysafirë dhe stafi shërbyes kishte shumë ngarkesë, shkruan Keystone-SDA. Ky shesh mbi lumë është epiqendra e qytetit për takime mes miqsh në ajër të hapur.

Por jo të gjithë restorantet (tarracat) ishin të hapura. Për disa, thjesht nuk ishte ekonomike të mobilizojnë gjithë ndüermarrjen, dhe të shërbejnë vetëm disa vende, në tarracë. Tarracat në Bellinzona ishin gjithashtu shumë të populluara. Pak para orës 9 të mëngjesit, shtatë tavolina në Piazza Collegiata ishin zënë. Publiku, kryesisht i moshuar, porosiste kafe.

Parashikimet e motit u japin shpresë nikoqirëve

Moti i njoftuar pranveror me temperatura të këndshme dhe shumë diell duhet të shkojë në favor të operatorëve të tarracave në restorante dhe bare në ditët në vijim.

Këshilli Federal ka vendosur të mërkurën e kaluar hapin e zbutjes, i cili ishte çuditërisht ishte shumë “zemërgjerë” sipas shumë vetave, përcjell albinfo.ch.

Që nga e hëna, krahas tarracave të restoraneteve, janë lejuar të rihapen kinematë, teatrot dhe stadiumet sportive nën udhëzime të rrepta.

---