Gjermania po shqyrton lehtësimin e masave për të vaksinuarit

(KEYSTONE/AP Photo/Jens Meyer)

Qeveria gjermane po synon një lehtësim të rregullave shëndetësore për personat e imunizuar ndaj COVID-19, njoftoi kancelarja Angela Merkel.

“Personat të cilët janë vaksinuar plotësisht ose konsiderohen të shëruar pas infektimit me virusin, duhet “qartë” të lejohen të shkojnë në parukeri, pa pasur nevojë të bëjnë testin negativ ose të përjashtohen nga karantina pas kontaktit me një të infektuar”, tha Merkel pas një takimi me udhëheqësit e 16 landeve gjermane, raporton Dpa, përcjell Albinfo.ch.

“Qeveria po punon kështu për një dekret që rregullon liritë nga të cilët këta persona do të jenë në gjendje të përfitojnë”, shtoi ajo, duke theksuar se projektligi do të duhet të miratohet nga të dy dhomat e Parlamentit, pa specifikuar datën.

Sipas shifrave të fundit nga RKI, rreth 23,4% e popullsisë ka marrë të paktën një dozë të vaksinës, 7,2% ose gati 6 milionë janë plotësisht të imunizuar dhe nga 3,3 milionë persona të infektuar me COVID-19, që nga fillimi i pandemisë vitin e kaluar, 2,9 milionë konsiderohen të shëruar.