Iniciativa për pensionimin në moshën 66 vjeçare vjen para votuesve zviceranë

Nisma bën thirrje që mosha e pensionit në Zvicër të rritet gradualisht nga 65 në 66 vjet dhe më pas të lidhet me jetëgjatësinë e popullatës

Elektorati zviceran ka mundësi të vendosë për nismën e pensionit, të iniciuar nga të rinjtë liberalë (të partisë FDP).

Sipas asaj që kanë deklaruar, të rinjtë liberalë kanë mbledhur mbi 130,000 nënshkrime për nismën e pensionit. Me këtë shifër, iniciativa mund të dalë në votim, shkruan SDA.

Ata duan ta paraqesin iniciativën në Kancelarinë Federale në mes të korrikut, njofton Partia e Liberalëve të rinj të premten në Twitter, transmeton albinfo.ch. Nisma bën thirrje që mosha e pensionit në Zvicër të rritet gradualisht nga 65 në 66 vjet dhe më pas të lidhet me jetëgjatësinë e popullatës.

Në mënyrë të veçantë, sipas tekstit të iniciativës, të rinjtë liberalë kërkojnë që mosha e pensionit të grave të rritet në 65 vjeç si hapi i parë. Ndërsa mosha e pensionit për gratë dhe burrat do të rritet gradualisht në 66 vjet. Kjo duhet të arrihet në vitin 2032.

Mosha e pensionit duhet të rritet më pas me nga 0.8 muaj për çdo muaj shtesë të jetëgjatësisë mesatare të ppullatës. Bazuar në prognozat e qeverisë federale, iniciatorët kanë llogaritur që në vitin 2043 do të arrihet mosha e pensionit me 67 vjet ndërsa në vitin 2056 pensionimi do të bëjhet në moshën 68 vjeçare.

Mosha e pensionit do të duhet të shpallet pesë vjet më parë. Ky mekanizëm garanton sigurinë e planifikimit për pensionistët e ardhshëm dhe gjithashtu mundëson që të gjithë të mund të kalojnë të paktën 20 përqind të jetës së tyre në pension.

Lidhja midis jetëgjatësisë dhe moshës së pensionit është diskutuar për një kohë të gjatë, përcjell albinfo.ch. BDP (sot “Die Mitte”) kishte paraqitur tashmë një mocion në vitin 2012 me këtë kërkesë, por ishte mbivotuar në Dhomën e Kantoneve të Parlamentit Federal.

Iniciativa për pensione e të rinjve liberalë nuk ka filluar pa shkaktuar zhurmë. Të rinjtë e BDP (“Mitte”), CVP (“Mitte”), EVP, GLP dhe SVP akuzojnë të rinjtë e FDP-së për planifikimin e iniciativës më vete pavarësisht nga marrëveshja paraprake.

---