Kriza me energjinë në Kosovë, ndalohet prodhimi i kriptovalutave

“Duke u bazuar në rekomandimet e këtij Komiteti Teknik, javën e kaluar kam marrë vendimin për Masa të Emergjencës përmes të cilit ndalohet prodhimi i kriptovalutave në të gjithë territorin e Republikës së Kosovës”, ka thënë Rizvanolli

Ministrja e Ekonomisë e Kosovës, Artane Rizvanolli, ka bërë të ditur se ka marrë vendim për ndalimin e prodhimit të kriptovalutave në Kosovë.

Rizvanolli ka thënë se këtë vendim e ka marrë me rekomandimet e Komitetit Teknik për “Masat e emergjencës në furnizimin e energjisë”.

Tutje, Rizvanolli theksoi se institucionet e rendit do të ndalojnë prodhimin e aktivitetit në fjalë në lokacionet e prodhimit të kriptovalutave, përcjell albinfo.ch.

“Institucionet e rendit do të ndalojnë prodhimin e aktivitetit në fjalë me mbështetje të të gjitha institucioneve relevante, të cilat do të identifikojnë lokacionet e prodhimit të kriptovalutave”. Këto obligime kanë për qëllim trajtimin e çfarëdo mungese të papritur ose afatgjatë të kapacitetit prodhues energjetik, kapacitetit të transmetimit apo të shpërndarjes së energjisë në mënyrë që të tejkalojmë krizën e energjisë pa rënduar më tej qytetarët e Republikës së Kosovës”.

---