Franca në alarm nga thatësira, thahen 25 për qind e lumenjve të vegjël

Ekspertët paralajmërojnë se vendi mund të përballet me një thatësirë edhe më të rëndë se ajo rekord e vitit 2022.

Franca po përballet me një situatë shqetësuese për shkak të thatësirës, teksa rreth 25 për qind e lumenjve të vegjël në vend janë tharë, sipas të dhënave të fundit të publikuara nga ekspertët, transmeton albinfo.ch.

Hidrologia Agnes Ducharne, studiuese në Qendrën Kombëtare për Kërkime Shkencore të Francës (CNRS), tha se treguesit aktualë paralajmërojnë një thatësirë edhe më të rëndë se ajo rekord e vitit 2022.

“Njëzet e pesë për qind e lumenjve të vegjël në Francë janë aktualisht të tharë”, deklaroi Ducharne, duke theksuar se situata ka tejkaluar nivelet e zakonshme të thatësirës.

Sipas saj, edhe pse rezervat e ujërave nëntokësore janë në gjendje më të mirë falë reshjeve të shumta gjatë dimrit, ujërat sipërfaqësore janë përkeqësuar me ritëm shumë më të shpejtë këtë vit.

Ekspertët paralajmërojnë se, nëse mungesa e reshjeve dhe temperaturat e larta vazhdojnë, gjendja mund të përkeqësohet edhe më tej deri në fund të verës./Albinfo.ch

---