Osmani dhe Abazoviq përplasen për “Ballkanin e Hapur”

Tema e ‘Ballkanit të Hapur’ u bë shkak i përplasjes mes presidnetes së Kosovës Vjosa Osmani dhe kryeministrit të Malit të Zi Dritan Abazoviq.

Gjatë një diskutimi në kuadër të panelit në Samitin e Demokracisë në Evropën Juglindore që po mbahet në Mal të Zi u shkëmbyen replika rreth pjesëmarrjes në këtë nismë rajonale.

“Për mendimin tim, një pjesë e shoqërisë në Mal të Zi e kundërshton [‘Ballkanin e Hapur’], vetëm sepse është kundër çdo gjëje që është Serbia. Ata nuk e kanë problem nismën, por kanë problem personal”, tha Abazoviq dhe shtoi se, sipas mendimit të tij, “problemet personale në politikë shpeshherë nuk japin mundësinë për ndonjë lloj vizioni”. “Unë nuk po angazhohem për ‘Ballkanin e Hapur’ ose për Procesin e Berlinit apo ndonjë nismë tjetër. Unë po angazhohem për bashkëpunimin rajonal. Çdo nismë që ka për qëllim bashkëpunimin rajonal, gjithçka që mund të shfrytëzojmë për bashkëpunim, është sukses”, tha Abazoviq, transmeton Albinfo.ch.

Ndaj deklarimeve të kryeministrit malazias reagoi presidentja e Kosovës, Vjosa Osmani. “Se a është dikush lider i zgjedhur në mënyrë demokratike, që beson në vlerat e sundimit të ligjit, të drejtat e njeriut dhe në demokracinë dhe a është dikush ish-ministër i propagandës së regjimit të [ish-kreut të Jugosllavisë, Slobodan] Milosheviqit, kjo duhet të ketë rëndësi. Në të kundërtën, porosia që po dërgojmë është se nuk ka rëndësi nëse je [presidenti i Ukrainës, Volodymyr] Zelensky apo [presidenti i Rusisë, Vladimir] Putin”, theksoi Osmani.

---